As obras terán un prazo de execución de 6 meses.
Os traballos consisten na construción dunha rede separativa na localidade da Senra e dunha planta depuradora de augas residuais para o anterior núcleo e tamén para A Pena.
O Diario Oficial de Galicia (DOG) publica na súa edición do 31 de agosto de 2010 a adxudicación definitiva das obras de mellora do saneamento da parroquia da Senra, no concello lucense de Cervo, por un importe de preto 400.000 euros. A adxudicataria das obras, que comezarán nesta primeira quincena de setembro e terán un prazo de execución de 6 meses, foi a empresa “Roymer Obra Civil S.L.”. A Consellería de Medio Ambiente, a través de Augas de Galicia, financiará o 30% por cento das obras, mentres que o Fondo Europeo de Desenvolvemento Rexional (FEDER) aportará o 70%.
Villares destacou “a boa sintonía” entre Concello e os veciños da Senra e agradeceu a súa colaboración e traballo para conseguir materializar esta obra. “Dende o Concello levamos varios anos traballando neste tema e para iso temos mantido diversas reunións cos veciños ao obxecto de telos informados en cada momento de como estaban a transcorrer as xestións fronte a Xunta e tamén lles pedimos que aportaran as súas suxestións de cara a mellorar este proxecto. Por iso, teño que dicir que neste proxecto tanto veciños como Concello levamos varios anos traballando da man para conseguir que esta infraestrutura de primeira necesidade sexa pronto unha realidade, como así será” asegurou o alcalde.
