BICENTENARIO DA MORTE DO MARQUÉS DE SARGADELOS

1809-2009 

ANTONIO RAIMUNDO IBÁÑEZ, o MARQUÉS DE SARGADELOS foi asasinado un 2 de febreiro de 1809 durante os disturbios da Guerra da Independencia na súa casa de Dompiñar por unha turba alentada polos seus inimigos. 200 anos despois desta data, unha comisión integrada polos concellos de Cervo, Santalla de Oscos (Asturias) e Ribadeo, a Consellaría de Cultura e Turismo da Xunta de Galicia, o Real Padroado de Sargadelos, a Deputación de Lugo e o Consello da Cultura Galega presentaron un programa de actividades para reivindicar a figura histórica deste persoeiro así como a súa obra

Entre as actividades, sobrancean unhas XORNADAS DE VERÁN dirixidas polo catedrático de Historia Moderna da Universidade de Santiago de Compostela (USC) Pegerto Saavedra, que se desenvolveran os días 13, 14 e 15 de xullo e que versarán sobre a figura de Ibáñez nas súas diversas facetas.

O Consello da Cultura Galega elaborará un Roteiro dentro da súa nova aplicación web Roteiros da Cultura Galega para amosar os lugares clave da vida do Marqués.

A Concellaría de Deportes do Concello de Cervo puxo en marcha o  programa de lecer nocturno xuvenil “NOITES ALTERNATIVAS”

Este programa ten como obxectivo proporcionar aos mozos e mozas de máis de 10 anos unha oferta de ocio alternativo grazas ao aproveitamento de espazos lúdicos e  das instalacións deportivas fóra do seu horario habitual de uso. 

Tamén pretende fomentar hábitos de vida saudables e, máis en concreto, aqueles centrados na práctica do deporte como modelo alternativo para reducir o alto índice de consumo de alcol nas noites de verán.

O Concello de Cervo oferta un gran número de actividades entre as que se inclúen competicións de FÚTBOL SALA 3X3, BALONCESTO 3X3, VOLEIPRAIA, FÚTBOLPRAIA, XOGOS E CONCURSOS.

A maiores disto, o Concello de Cervo promoverá unha nova edición do Torneo de Futbol 7 no Campo Municipal da Veiga (días 10, 11 e 12 de xullo). E un torneo de Tenis os días 28, 29, 30, 31 de xullo e 1 de Agosto, nas Instalacións Deportivas e para a Xuventude do Club de Rio Cobo.

• Premento neste enlace podes consultar os horarios das distintas actividades. A participación nas NOITES DEPORTIVAS É GRATUÍTA, sen ningún custe para os rapaces e rapazas. Todas as actividades están coordinadas por persoal experto e altamente cualificado adscrito á mesma empresa que desenvolve as Escolas Deportivas Municipais (IG 10 Sports S.L.)

O Goberno municipal vén de amosar a súa satisfacción tras a concesión, por parte da Asociación de Educación Ambiental e do Consumidor (ADEAC), de tres bandeiras azuis ao Concello de Cervo: unha para o Ecomuseo Terras Azul Cobalto e dúas máis para os areais de O Torno e de A Caosa en San Ciprián.

Desde o Goberno municipal “sempre se traballou apostando polo aspecto turístico e económico do concello e esta distinción é unha gratificación e un recoñecemento ao traballo ben feito”.

Desde o Executivo municipal recordaron que as bandeiras azuis “son un distintivo que premia aquelas praias que cumpren con rigorosos requisitos de calidade nas augas, nos servizos e na seguridade da súa zona e área de baño”, así como tamén “a realización de actividades de calidade e xestión ambiental”. A finalidade última dos galardóns concedidos ás praias do Torno e, desta vez tamén á Caosa “resulta ser unha aposta clara polo desenvolvemento sostible do turismo e do conxunto do litoral”.

 “Aínda que as praias deste concello se viron afectadas polo temporal Klaus, a día de hoxe están sendo acondicionadas e contamos que tanto os veciños, como a xente que nos visita, poidan gozar delas a principios de verán” –explicou o Alcalde. O acondicionamento dos areais de todo o municipio (tanto os distinguidas coa bandeira Azul como a de Rueta, Cubelas, etcétera) estase a realizar por brigadas municipais e con medios propios, xa que a pesar de que se solicitou a colaboración da Deputación de momento non se pronunciaron.