12/08/2016. O Concello de Cervo entregou hoxe subvencións deportivas a clubs e asociacións. Ascenden a 40.500 euros e benefician a nove entidades.

O Concello de Cervo entregou onte, xoves, as subvencións destinadas a clubs e asociacións deportivas. A partida ascende a 40.500 euros e beneficia a un total de nove entidades.
O alcalde, Alfonso Villares, explicou que “ desde o Concello de Cervo vimos de entregar as subvencións a aquelas entidades que practican deporte no noso concello. Foron un total de 40.500 euros os que destinamos desde o Concello de Cervo a estas entidades deportivas”.
Alfonso Villares detallou que “entre elas están a Sociedad Deportiva San Román, Sociedad Deportiva Candelaria, Club Deportivo San Ciprián, Sociedad Deportiva Cervo Sargadelos, Asociación Deportiva Veteranos de San Ciprián, Club de Tiro con Arco Iadovi, Club Medela Mountain Bike, Club de Tenis de Mesa San Ciprián e Club Limosa Surf”.
O rexedor municipal engadiu que “estas axudas veñen ademais de distintas colaboracións que se teñen con estas entidades deportivas ao longo de todo o ano, que van desde axudas en persoal a materiais para moitos dos eventos que realizan estas entidades deportivas”.
Villares salientou que “o Concello de Cervo caracterizase por algo que levamos dito tamén moitas veces, que temos unha cantidade de instalacións deportivas de calidade e creo que hai poucos concellos que dispoñan do que ten Cervo. Ademais algunhas destas instalacións son únicas na nosa provincia”.
O alcalde de Cervo asegurou tamén que “o noso obxectivo é que xa que temos instalacións queremos que se usen; e así se está facendo, ben por persoas privadas ou por estas asociacións, e queremos fomentar seu uso. É importante destacar que nós, desde o goberno de Cervo, estamos concienciados de que a práctica deportiva é fundamental para todas as sociedades. Por iso que para nós é fundamental que o deporte sexa unha forma de vida e unha forma de ser do Concello de Cervo. Así o estamos fomentando a través das Escolas Deportivas Municipais e das Noites Alternativas, que están tendo lugar nestes meses de verán; o deporte base e dos máis novos, porque creemos que iso é fundamental para todas as sociedades”.
O rexedor cervense fixo fincapé en que “estas axudas veñen a reforzar esta aposta que ten Cervo co deporte, neste caso destinadas a estas asociacións e entidades deportivas”.