O CONCELLO DE CERVO VÉN DE POÑER EN FUNCIONAMENTO A SEXTA DEPURADORA DO MUNICIPIO

A depuradora do Burgo de Trasbar súmase así ás de Figuerido e a Senra, no rural; ás de Cervo e San Ciprián, que dan servizo ás zonas máis urbanas; e á do Polígono de Cuíña, que trata as augas pluviais

• O investimento municipal para levar o saneamento a esta zona supera os 240.000 euros
• 

O Concello de Cervo vén de poñer en funcionamento a sexta depuradora do municipio.

Trátase da depuradora que dá servizo ao Burgo de Trasbar, e ata alí se desprazaron para ver o funcionamento in situ; o rexedor, Alfonso Villares, a edil de Medio Ambiente, Manuela Méndez, e a pedánea da zona, Marina Díaz.

Villares sinalou que esta nova infraestrutura vén sumarse ás de Figuerido e A Senra, no rural; ás de San Ciprián e Cervo –ecolóxica e de plantas macrofitas-, que dan servizo ás zonas máis urbanas do municipio; e tamén á depuradora que está no Polígono Industrial de Cuíña, que é únicamente de augas pluviais, que tamén son tratadas.

O alcalde destacou que esta nova depuradora é similar á que temos en funcionamento na Senra, de tratamentos físico-biolóxicos; e apuntou que “levamos insvestidos máis de 240.000 euros nos últimos tres anos na rede de saneamento deste Burgo, un servizo que consideramos esencial tamén no rural; e aínda temos a previsión de  mobilizar máis fondos para pechar por completo a prestación neste Burgo; xa que a día de hoxe quédanos só o núcleo de Cabanelas descuberto”.

O rexedor puntualizou que “é importante que os veciños saiban en que investimos os seus cartos; porque, aínda que son infraestruturas soterradas, que non se ven, son fundamentais, e aportan ademais ese valor engadido ao rural, “porque a calidade dos servizos que se ofrecen poden ser determinantes e marcar a diferencia para que novas familias se decanten polo noso Concello para asentarse”.