VOLVE O SANCI TAPEANDO, A PROPOSTA DA HOSTALERÍA DE SAN CIPRIÁN PARA TODOS OS XOVES
A iniciativa gastronómica, que regresa a partir deste xoves, 16 de outubro, conta coa participación da Cervecería A Penúltima, Cervecería Las Titas, Bar Maruxaina, Bar OFaro, Terraza O Noso Lar e Bodega De Ana, coa colaboración do Concello de Cervo.
A hostalería de San Ciprián volve poñerse en modo tapeo coa iniciativa “Sanci Tapeando”, que regresará a partir deste xoves, 16 de outubro, ofrecendo unha nova oportunidade para gozar da gastronomía local a un prezo accesible e nun ambiente de proximidade.
Esta proposta gastronómica, que conta coa colaboración do Concello de Cervo, reúne nesta edición aos establecementos Cervecería A Penúltima, Cervecería Las Titas, Bar Maruxaina, Bar O Faro, Terraza O Noso Lar e Bodega De Ana.
A presentación tivo lugar na Casa da Cultura e contou coa presenza da rexedora Dolores García Caramés, da concelleira Mali Méndez, e dunha representación dos locais participantes.
Durante todos os xoves, cada establecemento ofrecerá unha tapa diferente e elaborada, ao prezo único de 2,5 euros. Ademais, as persoas que se acheguen a degustar as propostas poderán participar nun sorteo de dous vales, de 200 e 100 euros, para consumir nos locais adheridos á iniciativa.
TAPAS DESTE PRIMEIRO XOVES, 16 DE OUTUBRO
Cervecería A Penúltima: solombo en salsa de castañas
Cervecería Las Titas: timbal de gulas
Bar Maruxaina: mexillóns á mariñeira
Bar O Faro: tosta castelá
Terraza O Noso Lar: hamburguesa de tenreira con queixo San Simón e cebola caramelizada
Bodega De Ana: ovos rotos
As persoas interesadas poden seguir semana a semana todas as tapas e novidades da ruta gastronómica a través da conta de Facebook “Sanci Tapeando”.
Dende o Concello de Cervo anímase á veciñanza e visitantes a participar nesta nova edición do Sanci Tapeando, unha excelente mostra da calidade culinaria e da vitalidade da hostalería local.