O CONCELLO DE CERVO VÉN DE CLAUSURAR O CURSO GRATUÍTO DE MONITOR DE TEMPO LIBRE NO QUE PARTICIPARON 13 RAPACES

Forma parte do programa Avívate en Cervo, que comezou o 3 de xullo e se prolongará ata o 21 de agosto con diferentes obradoiros de motivación persoal

O Concello de Cervo, a través da delegación de Xuventude, continúa co programa “Avívate en Cervo”.

Este programa, destinado a mozos e mozas entre 18 e 30 anos conta con 13 alumnos e consiste na realización dunha serie de actividades encamiñadas a proporcionar ós mozos e mozas da motivación e das habilidades necesarias no eido do tempo libre e deste xeito promover o emprendemento baseado en valores.

Este martes deuse por finalizada a actividade principal do curso, o Curso de Monitor de Tempo Libre, que dota ós alumnos dun apoio importante de cara a empregabilidade, calidade humana e compromiso co desenvolvemento profesional.

O vindeiro xoves 17 de agosto impartirase o “Obradoiro de intelixencia Emocional para vivir a túa paixón”.

O venres 18 o obradoiro “Avívate, estratexias para acadar os teus obxectivos.

Por último, o día 21, darase a charla de “Motivación empresarial”, haberá un xantar de convivencia e rematarase co obradoiro “Non desesperes…relax”.